【八方相當年】幫爺爺計賠率 劉業強計出跑馬仔興趣

咪睇劉皇發公子、鄉議局主席劉業強斯斯文文,鏡頭前唔算多嘢講,估唔到發仔原來係長氣袋--長跑愛好者,中學喺男拔萃讀書時最鍾意運動,排球、踢波、長跑乜都啱,同學仔三點半放學後就返屋企溫書,佢就喺放學後至6點半以運動為樂,試過一跑跑足幾個鐘,仲話試過由學校跑去清水灣井欄樹,乜咁鬼厲害㗎!

今年50歲嘅發仔有三個家姐同一個細佬,小學就讀中華基督教會何福堂小學,佢話經常同朋友仔周街玩,最鍾意攞住一毫子去士多「潛」嘢,貼紙;遊戲咭同波仔乜都有得潛。小學仲學過螳螂拳,大過啲就學過功夫同劍擊。

中學入咗男拔,雖然愛運動,但唔係風頭躉,讀書中規中距啦,當時以數學科成績最好,「因為唔使讀,最唔鍾意死記硬背」。中五後到英國讀寄宿學校,因為家姐提議佢放眼看世界,自己都好認同,所以赴英浸鹹水。之後喺英國倫敦政治經濟學院(LSE)主修統計學,「爸爸都畀好大自由度,無話要揀邊啲科讀」。90年代初公司家族生意較忙,爸爸亦開聲叫到,所以返嚟香港幫手。

由於爸爸早年已經政商兩忙,發仔話細細個由女麻女麻湊大,「女麻女麻會講好多中國故事,薜仁貴東征、哪吒割肉還母,嗰時都唔知真定假。」雖然平日同爸爸見面時間唔算多,但佢哋一家人每逢周日,幾乎風雨不改坐埋飲茶聚天倫,「飲茶時不停會有街坊嚟搵老竇講區內問題...啲街坊好醒,知道星期日可以喺邊度搵到發叔。」

馬會會員兼馬主,馬場不時見到發仔影蹤;咁鍾意跑馬活動,係咪又同爸爸有關?原來唔係,發仔話反而係受爺爺影響。佢話爺爺係傳統新界人,愛跑馬仔兼扒龍舟,佢知道孫仔數學方面有少少天份,細細過就畀佢發揮,「畀啲數據我計下啲馬嘅賠率」,所以佢自小亦愛睇賽馬,「諗返對跑馬嘅興趣,應該係發芽於此。」


劉業強讀男拔時經常參加長跑。
(劉業強提供圖片)

劉業強讀男拔時經常參加長跑。 (劉業強提供圖片)

劉業強(前)話自己嘅跑馬興趣,係源自相中好鬼有型嘅爺爺。右為家姐;爺爺手抱嘅係細佬。
(劉業強提供圖片)

劉業強(前)話自己嘅跑馬興趣,係源自相中好鬼有型嘅爺爺。右為家姐;爺爺手抱嘅係細佬。 (劉業強提供圖片)

劉業強嘅去飲look好精靈。
(劉業強提供圖片)

劉業強嘅去飲look好精靈。 (劉業強提供圖片)

劉氏家族全家福。

劉氏家族全家福。


政綱睇真啲候選人冷知識小測點解佢有票