03年去咗世衞工作嘅陳馮富珍,最近被熱傳係特首黑馬。

03年去咗世衞工作嘅陳馮富珍,最近被熱傳係特首黑馬。

【李八方online】陳馮富珍離港13年 做唔成特首黑馬?

距離2017年3.26特首選戰得嗰四個月都冇,有心出選特首嘅人士,理應已經浮晒面,偏偏政圈呢排就不斷瘋傳,特首寶座嘅真命天子另有其人,唔係政務司司長林鄭月娥、財政司司長曾俊華或新民黨主席葉劉淑儀,而係大家估佢唔到嘅人。到底係邊位?最新黑馬大熱係個「好」字,就係世界衛生組織總幹事陳馮富珍及港大學校務委員會主席李國章,但有知情人士就提出原因話唔似。

先講陳太,03年去咗世衞嘅佢,明年6月卸任總幹事。早前有關佢選特首消息流出後,陳太自己都回應過,話屆時已經70歲,希望退休享天倫樂。由於講過N屆唔選嘅人都會繼續去馬,所以啲人對佢自行落閘仲半信半疑。

有心水清政界人士卻指,《基本法》列明嘅特首參選人要求,當中包括在香港通常居住連續滿20年等五大條件,而陳太則喺03年到世衞工作至今長達13年,似乎未必過到呢一關,唔似真正禮賓府主人。

至於李國章,撇開佢嘅惹火度同梁振英不相伯仲、冇能力解決社會矛盾呢一點唔講,其實都年屆71歲,雖然可能仍有心有力,但蜜運中嘅佢能唔能夠分身處理政事?相信都會有唔少人質疑!

到底邊個先係真正黑馬?有建制中人話,至今仍然有特使問佢,仲有冇其他好嘅特首人選推薦?似乎未到選舉大直路,大家都要抬頭睇路!


政綱睇真啲候選人冷知識小測點解佢有票