【八方相當年】估你唔到!胡官愛流連廟街平民夜總會

雞年頭炮【八方相當年】,主角同今年生肖雞仔無關,反而係一隻馬仔,就係已經宣佈參選特首戰,積極爭入閘跑馬仔嘅退休法官胡國興嘞!點解明明退咗休,咁消遙快活,都要咁辛苦見選委去拉票呢?胡官話呀,一切係由廟街開始。係呀,大家無聽錯,係有平民夜總會嘅廟街呀!

71歲嘅胡官喺宣佈參選當日話呀,其中一個出戰特首賽嘅主要原因,係不滿現任特首梁振英治下幾年,社會撕裂,而佢由做大律師到法官,到家選特首,希望令香港重回正軌,行正道,原來要由廟街講起。有成十兄弟妹嘅胡官憶述,年少時家住佐敦,細個時成日夜晚晚去廟街嘅平民夜總會流連,當時買吓零嘴、睇吓賣武同雜耍,已經好開心嘞。

而嗰陣佢都不時見到個著唐裝嘅男人,向小販檔主收錢,自言當時雖然年紀小,但都仲知道佢喺度收「保護費」,事實上佢亦見到小販們一臉心不甘情不願。由嗰時開始,佢就立志要做大律師,為香港建立一個公義兼有人情味嘅社會喎。

胡官英華書院預科畢業後,去咗英國伯明翰大學修讀法律,佢向八方提供咗一張身穿畢業袍嘅相,係1968年佢喺伯明翰大學法學士畢業禮上拍嘅;著上燕尾服,西裝畢挺嗰張呢,係翌年佢喺葛雷士法律學院嘅大律師畢業禮時影。睇返當年今日,一樣都係面圓圓,但當年就戴黑框眼鏡好有書卷味。

但八方至like嘅,反而係佢1966年喺倫敦海德公園影嘅相,除咗眼鏡嘅佢,著住西裝CHOK扮甫士,嗰個迷人嘅眼神,當年可能冧死唔少女同學噃。


1966年喺倫敦海德公園影嘅相,除咗眼鏡嘅胡官著住西裝CHOK扮甫士,迷人嘅眼神當年可能冧死唔少女同學。( 胡國興提供照片)

1966年喺倫敦海德公園影嘅相,除咗眼鏡嘅胡官著住西裝CHOK扮甫士,迷人嘅眼神當年可能冧死唔少女同學。( 胡國興提供照片)

1969年胡官著上燕尾服,出席葛雷士法律學院嘅大律師畢業禮時影相留念。( 胡國興提供照片)

1969年胡官著上燕尾服,出席葛雷士法律學院嘅大律師畢業禮時影相留念。( 胡國興提供照片)

1968年胡官喺伯明翰大學法學士畢業禮上影嘅相。( 胡國興提供照片)

1968年胡官喺伯明翰大學法學士畢業禮上影嘅相。( 胡國興提供照片)


政綱睇真啲候選人冷知識小測點解佢有票