【八方剝花生】4位特首馬仔周三首度同場較勁

「薯片叔叔」曾俊華公佈政綱,但唔少「奶粉」已經叠埋心水,不論薯片政綱如何,都會提名畀「奶媽」林鄭月娥,好似中總18票,過年前已經講好咗會綑綁畀林鄭。之不過呢,就算有心水人選,The Show Must Go On,中總本周三舉行嘅新春酒會,唔單止請咗「奶媽」,會長蔡冠深透露請齊4個特首參選人,兼且統統應承出席,可能係戰選開打以來首次4人同場亮相。

講返中總,今年都有連串活動舉行,除咗一貫會舉行嘅經濟論壇,又會搞個創新創科創業大賽、一帶一路文化節等等,蔡冠深粗略估計各項活動加加埋埋,開支要2,000至3,000萬,o依家仲要籌多約1,000萬,佢話過年時去咗越南,皆因博鱉亞洲論壇想喺越南胡志明舉行,搵中總幫手合辦,所以新年時就去胡志明商討有關事宜。


政綱睇真啲候選人冷知識小測點解佢有票