《壹週刊》圖片

《壹週刊》圖片

【即時文摘】麥黃小珍收得平(左丁山)

林鄭月娥選舉經費公開,其中一項係政治公關費用,掛名做林鄭頭牌公關顧問嘅係麥黃小珍,公關行業內一位知名人物,工作69天,收費32萬元,即是日薪4638元,貴定唔貴?估唔到葉劉淑儀替「妹妹」肉痛,批評麥黃小珍可能知道林太有能力籌款,想「鑿一筆」喎。
林鄭都冇出聲,葉劉就出嚟摑麥黃小珍一巴,可見其人刻薄寡恩。喂,你葉劉開支經費披露,搵化粧師化粧扮靚,每次付費3000元,咁又貴唔貴呢?一次化粧要幾多時間?一小時還是要姿整啲,用兩小時?化粧師時薪就係千五到三千。做政治公關一日工作幾多個小時?據上一次2012年梁唐競選經驗,唐營公關講過俾左丁山聽,做特首競選公關,幾乎係一日24小時工作,平均每日睡覺時間只得五至六小時,如果收取時薪千五元至三千元(如葉劉嘅化粧師)嘅話,日薪應該係三萬至五萬元起碼,69天就是二百萬元以上,依家公關重量級人物麥黃小珍只收32萬,直情係大出血,乃念林鄭係佢港大同期同學之故,故此收費平到喊。
葉劉唔識公關行情,唔該咪亂噏,麥黃小珍如同其他公司客戶做顧問,每小時唔收費二千元就算佢冇料到。肯以低薪替林鄭辛苦69天,當係捱義氣及為CV增加亮點啫。
麥黃小珍收嘅月薪18萬,係克己價錢,無可批評,至於林鄭嘅公關形象、民望及選舉公關功效不如曾俊華嘅團隊,係另一件事,可以講係羅永聰一班新生代砌贏一班近乎退休年齡嘅公關大哥大姐而已。左丁山唔記得有冇見過麥黃小珍,但從葉劉淑儀之無的放矢就聯想到香港有好多人誤會公關行業,以為公關唔應該收錢。香港好多大機構做重大決策時,往往視過程為機密,只有董事會及法律顧問知道其詳,到政策公佈後,如受到公眾惡評,網上惡搞,先至慌忙推公關出台擋箭,做傷害控制(damage control),搞唔掂就搵公關人員做代罪羔羊,其實香港嘅有牌顧問(律師)聲音最大,吩咐董事長、公關人員在出事後,呢樣唔講得,嗰樣有法律後果,於是公關被逼變成啞吧,俾傳媒鬧多幾錢!律師收嘅費用高過公關顧問好多,躲在後面被鬧最少,可憐低薪無牌專業公關顧問要在前面捱箭,呢個世界係幾唔公道㗎。但政府及商界有太多葉劉淑儀呢種得把口之人,莫奈何。


相關文章

  1. 【即時文摘】兩個媽咪都優秀(陶傑)
  2. 【即時文摘】噢嗨喲,陳局長(陳也)
  3. 【娥事生非】奶粉多謝葉劉 代出一口冤鬱氣
政綱睇真啲候選人冷知識小測點解佢有票