設計對白

設計對白

【娥事生非】奶粉多謝葉劉 代出一口冤鬱氣

當選特首嘅林鄭月娥以及敗選嘅曾俊華,已經向選舉事務處申報選舉開支,外界將注意力集中喺佢哋兩位到底有乜金主支持,查實係人都估到林鄭獲中央力撐,地產商梗係會踴躍表態,相反薯片叔嘞喎……中央亮紅燈,邊有地產商敢同中央作對?所以捐款名單可算預計之內,反而林鄭公關大員麥黃小珍(Sandra)人工成32萬,就令唔少人意外!

受人錢財、替人消災,其實都好公道嘅,之但係當薯片叔唔少得力要員,如羅永聰等「零」薪酬瞓身助選,而Sandra卻領高薪相助,又難怪令好多人議論紛紛。

花生友聽聞Sandra人工出爐後,喺林鄭助選兵團內熱論紛紛,有人更share葉劉淑儀形容Sandra「掠水深」嘅即時新聞,等大家消消氣。有位冇支薪但有落手落腳嘅尊貴義工好氣頂,私下向友人呻呢位阿姐唔值呢個價,尤其不時搞出「關公災難」,執手尾嘅卻係佢哋,另亦有人不滿Sandra選舉期間想「獨霸」林鄭,好多人埋唔到阿姐身「進言」。估唔到呢32萬,掀起咁多是非火頭,更估唔到係葉劉幫佢哋出一口氣!

又講真,當一位公關大員,可以喺陪伴受訪者錄影訪問時插嘴搶答、唔聽傳媒電話回應查詢、以及令相關持份者的畀晒嬲嬲,功力之深,可見一斑。

另一個喺奶粉陣營「被討論」嘅係麗新集團林建岳助理陸瀚民,雖然薪酬8萬蚊較貼地,但因為佢都喺競選期間管理facebook同影片製作嘅主力,估唔到咁就使咗30萬咯!


政綱睇真啲候選人冷知識小測點解佢有票