【即時文摘】白燕難當家(左丁山)

老友M退休之後,回到母校香港大學做榮譽教授,唔係領個虛銜喎,真係落力教書㗎,一個星期上課六小時,覺得好有樂趣,與在中環搏殺嗰種商場如戰場嘅經驗,完全唔同。
前幾日老友M邀食飯,左丁山叫佢自象牙塔降落紅塵,到中環食番一餐,老友M話:「地鐵開通後,港大附近開咗好多新款餐廳,相信你一定未試過。不妨到石塘咀一行。」好吖,卒之由佢訂咗一間Cobo House,左丁山聽都未聽過,就在石塘咀南里8-12號,坐地鐵在港大站B2出口行過去。以為好易就去得到,點知出門時黃雨信號剛剛取消,仍然落雨,揸住把Cheap遮(OK便利店縮骨遮),行行吓居然彎咗,急忙丟之哉,走入7-11想話買過另一把,只見付款人龍排到出門口,唉吔,要趕時間就遲到嘞,於是遮都唔買就衝入地鐵站,去到港大站,搵B2出口,行成幾分鐘左右先至上到地面,南里究竟在邊一個方向呢?見出口旁有一位學生模樣嘅小姐正在睇手機,行埋去問一聲:「小姐,請問南里在邊一個方向?」小姐望左丁山一望,答話:「對唔住,唔知喎!」於是行出門口,來一個360度轉身周圍望,只係轉咗120度啫,就睇見身後面有大隻英文字South Lane,原來咁易搵,急急走過去搵到Cobo House,已經遲到十幾分鐘。
連忙向老友M講鎖你鎖你,跟住點菜,老友M介紹飲蘑菇湯及慢煮牛頰,嘩嘩,果然正斗,老友M話:「其實呢度最出名好食係甜品,不可不試。」於是餐後叫一客馳名朱古力,份量就過份大嘞,入口就一般,唔夠主菜咁好味道。不過食嘢係閒事啫,聽老友M講古仔仲好聽,佢自商界政界朋友聽嘅八卦料講某位親中建制派點解俾中聯辦封殺十分過癮,不過老友M警告千萬唔好寫出嚟,左丁山聽完,知道如果故事屬實,都係無謂寫咯。問佢對林鄭呢位港大師妹特首點睇,佢話將來特首之上還有高人,林鄭好有可能係扮演粵語殘片中白燕嘅角色,對上有一至兩個黃曼梨甚至陶三姑,師妹一定好難捱咁話。老友M比好多人有資格做林鄭政府嘅局長,但佢話對住一班精英港大學生,叻仔叻女甚多,教書好有滿足感,只係感嘆佔中之後,梁特對港大另外有一種態度,令不少港大人感受到低氣壓,希望林鄭師妹入主禮賓府後,對母校懷有敬意,消除敵意啦。左丁山禁不住要取笑佢:「白燕即使有敬意,黃曼梨還是恨意難除呀!」


政綱睇真啲候選人冷知識小測點解佢有票