【李八方online 】徐英偉「升呢」有望 民政局變「民記局」?

最年輕嘅副局長政制及內地事務局陳岳鵬,即將離開熱廚房,7.1後去美國深造。另一邊廂,現年41歲嘅民建聯徐英偉(Caspar),2008年出任民政局政治助理至今,八方聽聞,來屆佢有機會「升呢」,喺官場上更上一層樓,7.1後要負責嘅工作,已經排到密麻麻。

八方問過Caspar係咪升呢,佢只回應話未有人搵過佢,之不過呢,佢太太已經落咗「警告」,叫佢唔好諗住留喺屋企湊仔喎,呢一句,可圈可點。

據知現任民政局副局長許曉暉留任機會唔大,而呢個局向來係揸住政府條大水喉,負責各地區資源「分餅仔」,加上各式選舉亦關佢哋事,責任重大,中央向來傾向由「紅底」人士揸莊。

八方聽聞,民建聯劉江華7.1後會留任民政局長,即係好大可能同民記出身嘅徐英偉拍住上。如果成真,民政事務局就名符其實變成「民」(建聯)政局了。


政綱睇真啲候選人冷知識小測點解佢有票