【即時文摘】青年置業政策(左丁山)

呢日在中午飯局,各人話題都係集中在習近平七一講話,習近平除咗講中央底線,遵守憲法與基本法(當然係內地方式守法,不是香港人習慣之司法制度),發展是硬道理之外,還罕有咁提及「求大同,存大異」,實施以上四點過程中,要特別注意青年教育,青年問題,着力加強對青少年的「愛國主義教育」。
第一第二點就有大把「愛國人士」反覆演述,驚死人地唔識嘞,第三點就係老生常談啦,香港唔講經濟發展,坐喺度等坐食山崩咩,至於第四點,大家可能唔明白習大大之「求大同、存大異」係乜意思,「愛國人士」暫時當作聽唔到。至於重視青年工作咯喎,政務司司長張建宗立即宣佈一年內(點解唔係一個月內?呢位政務司司長難道係老油條?)將「青年事務委員會」(現任主席劉鳴煒)及「人力發展委員會」(現任主席羅致光)升格為「青年政策委員會」及「人力資源規劃委員會」,兩會均由張建宗親自擔任主席。由政務司長做主席就叫做「升格」,唔知係乜意思,大概係多撥資源俾呢兩個委員會啩,不過張司長已經係66歲,係阿爺阿公級人物,點瞭解今日青年呀?
飯局之中,金融K對青年問題最有意見,佢話睇吓政府數字就知道今日青年點解咁不滿社會。差餉物業估價署嘅最新官方數字顯示,2017年5月份私人住宅樓價指數創第七個月歷史新高,升至333.1,比1997年6月升多咗93.7%,單計最近五年,即梁振英做特首之五年,樓價升咗62.4%,換句話說,過去20年之樓價升幅,有三分之二係歸功於梁振英推高樓價。要注意,此乃官方數字,梁振英政府唔可以否認嘅,倘若樓價在20年內升93.7%,每年複式增長約3.42%,尚算平穩,但五年之內升62.4%,每年複式增長就係10.18%,就非普通人嘅人工升幅可以追得上,青年人之置業希望愈趨渺茫,有乜辦法唔生怨憤?金融K人在江湖,對財仔數目急速增加,年青人被金管局逼到向財仔借首期呢啲事情,知之甚詳,深知青年人置業之苦況,樓價一方面急升,另方面CY政府下令金管局收緊按揭信貸,青年人如不靠父母交五至六成首期,根本無法買樓,橫掂儲蓄都冇用,不如去多幾次日本啦,唔通去恩平浸溫泉咩。金融K咁講法,不如叫張建宗撤銷辣招,放寬按揭至8成,對象以40歲以下首次置業人士為限,呢樣先至會係針對性之青年政策,包保青年人高興,有咗置業能力,掛住供樓,就會怕失業,唔敢上街搞警察啦,老張明白未?


政綱睇真啲候選人冷知識小測點解佢有票